今年終於實行咗舊年上半年決定咗嘅事：辭職。
上個星期係我最後一個工作週，告別我做咗成十幾年嘅地方。
走之前，有人問我會唔會唔捨得，我都答冇，其實都冇，但最後嗰日，係有少少嘅。
又有好多人問我有乜打算，我真係冇。我只想休息，我想打理下顧下自己先。
原來呢種叫裸辭。呢輪好似好多人咁樣做。啲人又太多幻想，感覺好灑脫咁。
知我鍾意去旅行，有啲人甚至以為我第二日就飛。
有第二啲部門嘅同事又同我講，佢哋都有個後生咁呀，去咗外地見識，返到嚟成個人唔同晒。
其實，我乜都冇打算。我講笑咁回應，我唔細喇。同埋死啦，我第日分分鐘冇面見你哋添，因為我可能乜都冇做，冇改變架嘛。
我哋人生好似一定要有所作為咁。可能連我自己都咁諗啦，搞到呢幾日我都有啲唔慣，雖然我可以好閒咁去游下水食下嘢，但又真係好似冇目標咁。有啲迷失咁。
風土記 